Argenis et Poliarque ou Theocrine

a MONSEIGNEUR MONSEIGNEUR DE LA CHASTRE CONSEILLER du Roy en ses conseils d'Estat et prive, Chevalier des Ordres de sa Majeste, Capitaine de cent hommes d'armes de ses Ordonnances, et premier Mareschal de France. MONSEIGNEUR, Si je voulois croire le Respect, et considerer que je ne suis pas au nombre de ceux de qui les belles qualitez forcent doucement les inclinations des hommes, et qui n'ont qu'a se faire voir une fois pour estre desirez de tout le monde ; Je serois contraint d'avouer, que j'ay beaucoup de temerite, et que je trouve bien peu de merite dans cet ouvrage pour en attendre de vous un favorable jugement ; Mais il ne m'importe pas d'estre appelle temeraire, pourveu que l'on scache que vos commandemens excusent ma temerite, et qu'il est impossible de les recepvoir, sans concepvoir en mesme temps une bonne opinion de soy-mesme. Les plus humbles en deviendroient justement orgueilleux, et le desir de faire quelque chose, qui peut obtenir l'honneur de vostre approbation, leur feroit entreprendre mesme ce qui seroit impossible.