De la sagesse trois livres

ou est parle du nom, subject, dessein et methode de cest oeuvre. il est requis, avant tout oeuvre, scavoir que c'est que sagesse, et comment nous entendons la traicter en ce livre, puis qu'il en porte le nom et le tiltre. Or des l'entree nous advertissons que nous ne prenons icy ce mot subtilement au sens hautain et enfle des theologiens et philosophes (qui prennent plaisir a descrire et faire peincture des choses qui n'ont encore este veues, et les relever a telle perfection, que la nature humaine ne s'en trouve capable que par imagination) pour une cognoissance parfaicte des choses divines et humaines, ou bien des premieres et plus hautes causes et ressorts de toutes choses ; laquelle reside en l'entendement seul, peust-estre sans probite (qui est principalement en la volonte), sans utilite, usage, action, sans compagnie et en solitude ; et est plus que tres rare et difficile, c'est le souverain bien et la perfection de l'entendement humain ; ny au sens trop court, bas et populaire, pour discretion, circonspection, comportement advise et bien reigle en toutes choses, qui se peust trouver avec peu de piete et preud'homie, et regarde plus la compagnie et l'autruy que soy-mesme.