Le vassal généreux

Theandre seul. Stances. La porte du soleil est close, toute la nature repose, cet astre est loing de se lever : moy seul suis esveille par des soucis funebres, qui dans le milieu des tenebres, trouvent des yeux pour me trouver. La pasle image de la crainte, en moy si vivement empreinte, me vient troubler a tout propos : j'ay peur de l'inconstance, et de la tirannie ; et suy bien la ceremonie, qui me deffendoit le repos. De deuil ma voix est estouffee : je ne scaurois voir ce trophee, sans craindre d'en servir un jour : l'orgueil de mon rival je n'oserois abatre ; si bien qu'il n'a plus a combatre, qu'une fille, un enfant, amour. o dieux la foible resistance ! Et que pour vaincre la constance, un sceptre a de puissans appas ! Ha belle Rosilee, en regnant souveraine, je veux bien vous nommer ma reine, mais pourtant ne la soyez pas. Que si vostre desir souspire, apres les grandeurs d'un empire, vous aurez celuy de mon coeur : c'est ou vous regnerez en princesse absolue, aussi forte que bien voulue, mes yeux adorant leur vainqueur.